Ways of Life

Wineeyim Hap’iskw

Anw̓iig̱oothl Nisg̱a’ahl lip wilaa loodiit ahl hoon g̱anhl yats’iskw ahl gipdiit, ii ḵ’ap huxwdiit gipdiithl maay̓ g̱anhl hlag̱a ts’uuhl y̓ans.

G̱abiihl ḵ’ap sim gibihl Nisg̱a’a: sim maay̓, t’ist’uuts’gum w̓ihleeḵsim sg̱an̓ist ihlee’etgum w̓ihleeḵs ii huxw maay̓im gililx. Sayt hlwalksa’andiithl maay̓ iit gwalkwdiithl dim gipdiit ahl tx̱as maadim. Wilk’iit gipdiithl miigunt g̱anhl miiḵ’ooḵs, nidiit gwalkwdiit loot. Huxwdii ḵ’ap wilk’ii gipkwshl ḵ’o’o g̱anhl ḵ’alams.

Ḵ̱’ap ksg̱alanḵhl is wil wineekshl sim’oogit loot. Nidiit w̓adiit ahl ḵ’alii-aksim Lisims. Yaldiithl is wil wayt ts’ipkwt, oo ligii jamtkwt ii gwalkwst.

Sbiks, milks, loots, g̱anhl snax̱, jamdiit dip gun iit sayt hlwaay̓ildiit ahl t’ilx iit t’ahldiit, dim gipdiit ahl maadim.

Hlaa kwsit ii ḵ’olx̱a’anhl Nisg̱a’ahl giikw iit saa-k’antdiithl haadikshl dim gipdiit. Luu-t’ahldiit ts’im-oven hliskwt ḵ’asḵ’ots diit ii hlaa yukwhl dim saa-bax̱hl kwsit iit

sayt dox̱diithl t’ipyees lax̱-lo’oba mihl ii wiy̓t ksax̱ gipdiit at sim x̱hlil̓t’indiit. Ham̓ooḵhl huxw gipdiit g̱ooḵhl sint. Haashl huxw gipdiit, bayt ḵ’otsdiit iit ksi-g̱aapx̱andiithl hli ts’eew̓it.

Ax̱, g̱anhl ḵ’ooḵshl huxw gipdiit ii tx̱as Portland Canal g̱anhl ḵ’alii-Lisims wil t’ahl hlaḵ’askw ahl aamithl dim gipkwsit.

Wa’umshl huxw ḵ’ap sim anw̓iig̱oothl Nisg̱a’a, hooxdiit wilt dimootkwdiithl hasiipkw.