Ways of Life

Hli Ayuuḵhl Wil N̓uw̓imhlkw

Jidaa n̓uw̓hl k’yoolhl Nisg̱a’a wilk’iit luu- yox̱kwdiithl g̱ag̱etgum ayuuḵ dim wilaa aamhl dim wilaa yeehl hli haykwhl n̓uw̓t ii aamhl dim wilaa jag̱am-aḵhlkwhl hli angatkwt. Guun̓ ii ḵ’ay yukw dip yox̱kwhl ayuuḵ tgun.

Jidaa n̓uw̓hl nakshl k’yoolhl gat wilk’iit w̓o’odiithl wil ksi-w̓itkwt dimt an lihlkt ii ḵ’ap sgihl dimt ksi-guutdiithl huxw ts’ins-jagwit dimt an lihlkt. Jidaa ḵ’ay dididilshl nakst an lihlkhl ts’ins-jagwit ii syanhl dim wilt.

Simutkwshl Nisg̱a’a wil saḵ’ap-wilhl hli haykwhl n̓uw̓t ahl ligii tx̱alpx̱hl sa. Ḵ̱’ap sgihl dim t’aahl ts’ins-jagwit ahl tx̱as n̓ihl tx̱alpx̱hl sa. Nidiit anooḵt an lihlkt dimt didalḵhl ligit naa, n̓ithl laax-algax̱at loot. Jidaa ax̱ wilt tgun, dim iit huxw tḵ’eskwhl g̱andidaxwhl hlag̱ats’uuhl angatkwdiit.

Ḵ̱’ay yukwhl sisgihl n̓uw̓t ii sgihl dim sim amaa ga’atkwhl wilaa al’algax̱dii, ii wilaa loodii. Ii nii dim dii g̱asg̱atshl g̱aksduul̓diit lax̱’uhl n̓uw̓t. Oligii luu-dox̱hl lip anhooya’ahl n̓um̓hlgwit ts’im -x̱biis lax̱’uhl n̓uw̓t. Sim gik’uuhl ii sim nn̓iil̓ukwhl g̱ag̱eshl Nisg̱a’a. Ii huxw ayuuḵhl Nisg̱a’a ahl dimt ḵ’ap ḵ’otshl wil ksi-laksdiithl g̱ag̱esdiit g̱anhl g̱ahlgihl ts’ins-jagwit n̓ihl siwatkwsit ahl ḵ’ots g̱eskw. Wayt tku-ḵ’otskwhl g̱ag̱esdiit w̓ayithl g̱amuxwdiit ii tk’u-aḵhlkwt ii n̓it wilaa dimt adigwil ḵ’otsdiit ahl k’il̓hl k’uuhl. N̓it wilaa wilaayihl gat wil yukwhl sigatkwdiit.