Ways of Life

Gin̓am-wa ahl sii beebii

Ts’im-ayuuḵhl Nisg̱a’a, jidaa sgathl hlgutk’ihlkw ts’im-wilphl w̓ii sim’oogit ii ḵ’ap wilk’ii gin̓amtkwhl dim wat. Sayt w̓o’ohl sim’oogithl hli angatkwhl nox̱hl hlgutk’ihlkw g̱anhl wil ksilakshl hlgu tk’ihlkw.

Lisgithl bag̱adilithl k’uba ii’uxwt ahl k’yoolhl hanaḵ’ ahl ḵ’alii-aksim Lisims. Iit sim dashl g̱oothl sim’oogit dimt gin̓amhl dim g̱ahuwadiit. T’aatdithl lil̓git iit huw̓o’ohl hli angatkwhl nigwoothl k’ubatk’ihlkw, dimt an itkwhl g̱ahuwahl k’uba ii’uxwt. Wilaa diyeetkwshl ayuuḵhl Nisg̱a’a ahl w̓iit’isim lil̓git.

Bag̱adil ant itkwhl wa, k’yoolhl sim’oogit ii k’yoolhl sigidimnaḵ’. Ii x̱hlg̱a’umhl nox̱hl k’ubat- k’ihlkw ahl sim g̱atg̱etgum aguhl gin̓amdiit ahl wil ksilaksdiit.

Hlaa sim gik’uuhl-gi ii ḵ’ay yukwt amg̱oos nox̱t, g̱asg̱oot hlo’otdiit, ii sim an ajikshl hlgit ahl g̱ahuwadiit wil wayt t’ist’isdiit.